讀書啦

近日家人又提議我去讀多個學位或都果d CFA之類既野, 等我都講下我對時下進修成風既睇法.

自古以來中國人都十分相信學歷係通往成功既重要途徑. 的確, 現在如果你無一個大學學位, 你既生活都應該唔係太好過. 我絶對認為, 一個大學學位係必要既. 但係, 讀書並唔係成功既唯一因素. 因為無論你係去上堂, 定係自修, 你所學既都係一啲資料, 甚至只係一啲考試技巧. 我唔係話依啲野無用, 如果你d專業人仕咪有用羅.

現時香港既工作時間, 已經長到一個不合理既程度. 你唔ot, 好似係有罪咁. 你試下同你啲朋友講你嫌7,8點放工好夜, 成班友當你係海洋公園對熊貓咁望住你. 好多時放左工, 食埋飯, 你都累到唔想做其他野, 惶論去讀書. 去來做左幾年野, 體會到工作上除左係教科書上既知識外, 需要既野實在太多太多, 人際關係, 待人接物, 同工作無直接關係既知識 (而家好似叫通識), 健康, 同埋我覺得最重要既, 係知道依個世界發生緊乜野事, 同埋對果啲事有你自己既分析, 睇法. (我有幾個大學同學, 老實講, 我唔覺佢地知依個世界係點運作, 依個係另一個問題)

以上果啲野, 都要時間去發展, 去培養. 試過工餘進修既人知道, 你剩番既時間有幾多.

好多人會話, 後生仔, 攞多個學位, 之後揾既錢咪仲多, 我相信依個亦係99%去進修既人既原動力. 係咩? 都係果句, 啲需要專業資格果啲行業咪係羅. 其他既, 包括我做緊依行, so far, 我唔覺得係喎.

一個大學畢業生, 係無父蔭既情況下, 佢頭果幾年儲蓄既資本, 對佢既一生係有好大影響. 有啲人會剩唔到幾多, 或者攞去讀書, 結婚, 買樓(依個我覺得最笨, 買百幾二百萬負債番來, 當然, 你好揾好多或者唔記得去便利店就另計啦).

我觀察我好多朋友, 同學, 大部份既人去進修, 都係因為一個字-驚. 見到身邊既人, 好似個個都揾啲野讀下, 自己唔讀, 咁唔掂喎, 等我都去揾啲野讀下. 我想問下, 有幾多人係確實份工有需要, 或都係對知識既渴求而去進修啊?

其實, 學野有好多種方法, 進修固然係, 睇其他書都係, 同啲有智慧同人生經驗既人傾計更加係. 我時常覺得, 我鍾意同啲大我十至廿年既人傾計多過同啲同我差唔多年紀既人傾.

講係咁講啫, 其實我都打算出年繼續我個停左n年既cfa level 2.....